Maqalilar

Sherqiy Türkistandiki Türmilerning Türliri

Sherqiy Türkistandiki türmilerning sani milliy mekteplerning sanidin köp bolup, u türmilerning türlirimu köp.

"Uyghur Aptonom Rayonluq 1-Türme" (Abitjan Obulqasimni zeherlep öltüriwetken türme bolup, mexsus wetenperwerler, tajawuzchi-terrorchi xitaylargha qarshi heriket qilghan yaki shundaq idiye, étiqadqa ige bolghanlarni qamap qiynaydighan we öltüridighan fashistik türme) din bashlap nomur selin'ghan türmiler, her qaysi wilayetlerdiki jamaet xewpsizlik idarisi qarmiqidiki türmiler, Sherqiy Türkistandiki 90 gha yeqin nahiyide tesis qilin'ghan yerlik hökümetke qarashliq türmiler, her qaysi wilayet, herbi gazarmilardiki türmiler, herbi bazilardiki türmiler, (tajawuzchi armiyining bashqurushidiki)mexpiy türmiler, qoralliq tajawuzchilarning "herbiy rayon türmisi"-dep atiwalghan türmiliri, xitay qoralliq saqchi qisimlirining türmiliri, tajawuzchi armiyening zapas qoshuni, xelqimizni qirghin qilish we barliq yer-mülklirimizni tez sür'ette bulash üchün wetinimizge kelgen düshmen armiyisi - "Shinjiang ishlepchiqirish-qurulush polkliri"- türmisi we uning Qumuldin Qeshqergichei Altaydin Xoten'giche sozulghan bipayan tupraqlirimizgha waba mikropliridek tarqalghan chérikliridin teshkil qilin'ghan diwiziye, polklirining mexsus türmiliri, dölet bixeterlik idarisi, dep atilidighan mexpiy razwetka we süyiqest, ziyankeshlik, yoshurun öltürüsh, jemiyette wehime peyda qilish we terrorchiliq wezipisini öteydighan idarilarning yéngidin köpeytiliwatqan qorqunchluq türmiliri,xitayche "shaoguansuo"dep atilidighan ösmür jinayetchiler türmisi, xitayning mewjutluqidin yirginidighan (Abduleziz Mexsumnimu Ürümchidiki 4-doxturxana dep atilidighan zapas türmige qamap qoyghan) wetenperwer Uyghurlarni qamap qoyidighan rohi késellikler doxturxanisimu zapas türmilik rolini oynaydu, Sherqiy Türkistandiki nechche ming yeza-qishlaqqa mixlap qoyulghan xitayche 'peychusuo' dep atilidighan saqchixanilarning zalliri, qaznaqliri, kolléktip tutqun qilish ewjige chiqqan 'tökme pesil'- (Uyghurlargha qattiq zerbe berish pesilliri)de ularmu yetishmise idare-jemiyetning ishxana, ambarlirimu türme ornida ishlitilidighandin bashqa xitayche erzen (bu waqitliq türme, xitay emeldarlarning chüshige kirip qalghan Uyghurlarni tutup qamaydighan we qiynap yoq gunahi üchün iqrar qilduridighan we ailisidin eghir jerimane elip qerzge boghup qiynaydighan fashistik türme, bu xildiki türmiler xitay tajawuzchilirining bulangchiliq, qatilliq we terrorluq jinayetlirige qarshi söz qilghan yaki xitayning jinayet ötküzüshini tosqan hemde tosmaqchi bolghan Uyghur, Qazaq, Qirghizlarni xalighan xitay qolgha élip qamaydighan, qiynaydighan we mülkini musadire qilidighan türme) lerni qoshqanda mekteplerdin heqiqeten türmining köp ikenligini chetellerdiki muhajitlirimiz we ejnebilermu asanla biliwalalaydu. Qiynash usullirigha qarapmu türmiler türlerge ayrilghan, mesilen, İli wilayiti Chapchal nahiyisidiki(Abduxelilni shehid qilghan) Su türmisi, yer asti türme, qumluq türmisi,...digendek.

Xitay tajawuzchi, terrorchilar gorohi xelq'ara jem'iyet we hökümranliqi astidiki xelqning közini boyash üchün, qanliq basturidighan bigunah xelqqa keygüzilidighan böhtan we qalpaqning namini yéqinqi yillarda özgertip "siyasi mehbus" ni "bölgünchilik idiyisige ige", "xitaygha qarshi sözligen"," xitaygha qarshi oylighan", " tajawuzchigha homayghan", " Xitaylargha Ablet Abduréshitqa oxshash tebessum bilen baqmighan", "sepildin chiqip Sherqiy Türkistanni güllendürüsh üchün kelgen xitaylarning 3 perzentlik bolushigha ökte qilghan", "xitaylarning bimalal béyishigha we ghezinini yötkep kétishige qarshi turghan ", "tajawuzchining bixeterlikige tehdit salghan", "tajawuzchining bixeterlikige tehdit sélish toghrisida bashqilarni küshkürtken"..- digendek sheytanmu aghzigha élishtin nomus qilidighan böhtanlar bilen wetenperwer qiz-yigitlirimizni qolgha élip qamap keldi. Téxi yeqindila "Ayallar türmisi"- digen atalghhuni chet'ellerdin angliwelip, chandurmasliq üchün Ürümchige hapila- shapila "ayallar türmisi"- tesis qilip xelq'ara kishilik hoquq teshkilatining közini boyashqa ülgürdi(Rabiye Qadir xanimni bu türmige qamighan).

Yuqurida tilgha elip ötken türmilerde Uyghurlarni, Qazaqlarni, Qirghizlarni xitay saqchiliri(emeliyette xitay terrorchiliri) nime qilghusi kelse shuni qilip xalighanche qiynaydu we pajielik öltüriwetidu, emma héchqaysisi bigunah adem öltürgenliki üchün sotqa tartilmaydu, Sherqiy Türkistan puqrasini öltürgen yaki mejruh qilish jinayiti sürüshte qilinmaydu we jazalanmaydu. Eksiche xitay terrorchi (saqchi)lar Sherqiy Türkistan puqrasini qanche weh'shi qiynisa u hökümetke shunche sadiq hésaplinip mukapatlinidu, xizmiti, emelliri we maashi östürilidu, herxil imtiyazlar hediye qilinidu.

Xitay terrorchilar hakimiyitining saqchi idariliri her ayda saqchilargha "tutushqa tégishlik Uyghur sani" we "pash qilinishqa tégishliq delo sani" hemde "Uyghur puqralardin élinishqa tégishlik jérimane sommisi" ni aldin wezipe qilip békitip béridighan bolup, Uyghurlar meyli xitaygha qarshi tursun yaki jim tursun, ular qolgha alidighan adem sani we töhmet chaplap tutqun qilinidighan puqra sani kemeytilmeydu, aymu-ay artip bériweridu. Pilan boyiche adem tutmisa saqchilarning maashi, mukapati we xizmet orni kapaletke ige bolalmaydu. Sherqiy Türkistandiki türmilerning jaylishish ehwali toghrisida kéyinki emgikimizde toxtilimiz.

2007-Yili 1-Ayning 16-Küni


2009-yili 12-Awghust, Charshenbe
Qaraxan
Bu uchur 1784 qétim oquldi.

Sherqiy Türkistan Jumhuriyiti Sürgündiki Hökümiti©2004-2015

XHTML 1.0 Strict xelqara ölchimige uyghun. CSS xelqara ölchimige uyghun.